Hallo Meneer Copycat (15 Desember 2017)

Daai soustafeltjie

Hallo Meneer Copycat (een van die sowat 60+ nou al),

[Geredigeer, Maart 2018: Neem kennis dat daar ‘n suksesvolle voorlopige patent (“patent pending”) aansoek toegestaan is in Februarie 2018 op hierdie, asook enige toekomstige ontwerpe van hierdie tafeltjie. Indien jy dus hierdie of ‘n soortgelyke ontwerp kommersieël beskikbaar wil stel, adviseer ek jou om rekords te begin hou van jou verkope.]

Jammer ek ruim nou eers tyd in om met jou te gesels, maar ek was hopeloos te besig om my oorspronklike Boggom soustafeltjies te bou en te verkoop, as om op die man af met jou te gesels.

Eerstens dude, voordat ek in die nitty gritty details ingaan – hemel tog man, mens skroef nie skroewe van die bokant af deur ‘n tafelblad nie! Deur GEEN tafelblad nie dude, al is dit hoe klein ookal. Dis bloot swak vakmanskap.

Nou goed, nou voel ek beter. Daai skroewe van jou het my die meeste gepla.

Dan – jy weet seer sekerlik dat ‘n spyker net homself vashou, en bogger all anders, nè? Nou vir wat gaan spyker jy ‘n klomp planke aanmekaar en noem dit ‘n soustafeltjie? Die ding gaan mos uitmekaar uit neuk met die eerste harde neersit-slag?

WAT, vra ek jou met trane in my navy blou oë – het jy gebruik om jou hoeke (angles) mee uit te werk? Jou kind se passerstel? ‘n Stokou gradeboog? WAT? Want sien, jou tafeltjie se bene lyk soos ‘n ysskaatser wat wil-wil split… en dit gaan seer wees. En dan’s hulle nie eers teen dieselfde hoek nie!?

Die hout wat jy gebruik is onidentifiseerbaar. Ek het hard probeer, maar ek gee wragtag op. Never mind die feit dat jy geen idee het dat die houtgrein mooi saam met die blad moet loop, en nie dwars nie. Eish dude.

En nou gaan verkoop jy die stuk gemors aan iemand vir R10 minder as wat myne kos? Nooit…

Kom ek wed jou – sou jy die moeite gedoen het – het jy die volgende besef:

  • Wat jy gedink het gaan jou ‘n uur of twee neem, het jou toe ‘n hele dag in beslag geneem. Dis nou as jy dit reg doen. En dit sluit die verf van die tafeltjie uit. Daai is nóg 2 dae.
  • Eerstegraadse knotty pine is duur, nè? Dis seker hoekom jy dit nie gebruik nie. En dit (knotty pine) het sopas met 43% in prys verhoog.
  • Jou handsaag is nie opgewasse vir die taak nie. En jy kry ook nie mooi reguit gesaag met ‘n tafel- of mitresaag nie, want jou skills ontbreek so effens.
  • Dik hout lyk soos die hond se gat op ‘n tafeltjie wat veronderstel is om ‘n skaalmodel van iets groters te wees. Soos wat die tafeltjie kleiner word, moet die hout ook in verhouding dunner word – maar dit sou beteken dat jy die hout moet dunner sny of afwerk – wat obviously hopeloos te veel moeite vir jou is, Meneer Copycat.
  • Jy het geen idee wat ‘n router is, of wat dit doen nie. Daarom is my oorspronklike Boggom soustafeltjie aan BEIDE kante (bokant en onderkant) van die blaaie en sitplekkies afgewerk. Aan die bokant het ek ‘n rounding over bit gebruik, aan die onderkant het ek die skerp kante van die hout met ‘n 45 grade bit afgewerk. Ek sien jy het jou blaaie en sitplekke gesaag… en toe net so gelos. Te veel moeite en harde werk om dit te rout, nè?
  • Terug na die spykers wat jy gebruik het om jou St.6 houtwerkprojek mee aanmekaar te flans – ek hoop jy het darem gom ook gebruik, alhoewel ek sou skat dat dit cheap goed is. Ek gebruik Alcolin se blou reeks, of Brummer se Balcotan. Indien jy die moeite gedoen het om te gaan kyk, sou jy geweet het… daai lym is vrek duur, nè?
  • Het jou tafeltjie darem ‘n stuk skuurpapier gesien, of nie? Want dit lyk nie so nie… In Boggom se geval, word die blaaie en sitplekke geskaaf, dan met ‘n 100 grit afgewerk, daarna 180 grit, en laastens met ‘n 240 grit op ‘n orbital sander. Net soos met die lym, sou jy agtergekom het… skuurpapier is duur, nè?
  • Is jou knockoff geverf of vernis, of verkoop jy hom sommer net so rou? Want sien, die oorspronklike Boggom soustafeltjie kry ‘n hele 3 lae Gripseal Clear – en word tussen lae mooi geskuur ook. Jip, jy’s reg – Gripseal is woes duur, nè?
  • Toe tannie Sus wou hê jy moet ‘n knockoff vir haar Pofadder toe stuur, het jy vir die eerste keer kennis gemaak met die term “volumetriese gewig”. Postnet moes herhaaldelik vir jou verduidelik hoekom jou 1 kg St.6 projek nou skielik 9 kg weeg – en hoekom jy nie kwalifiseer vir die R99 opsie vir minder as 5 kg nie. En toe kos dit jou R322 om die pakkie by tannie Sus uit te kry. Wat sy om die dood nie wou betaal nie. Koeriers is duur, nè?
  • Jy het gedink jy gaan sommer gou ‘n boks koop iewers… bokse is duur, nè? Jou tafeltjie is toe sommer net so in ‘n boks wat jy agter die Pick n Pay opgetel het, hier weg. Sonder beskermende verpakking. Al Boggom se produkte word met EVA spons verpak en beskerm. Gaan Google hom. O ja, en vind bietjie uit – daai spons is duur, nè?

Na dese gaan dit my verstand te bowe hoe jy dan die vermetelheid het om jou knockoff te probeer verkoop vir R10 minder as myne – of soos daai een ou, sommer vir 40% duurder as myne. Want jy het definitief nie R10 minder effort ingesit as ek nie. Of R10 minder aan materiaal gespandeer nie.

Ook: sou jy voorts die vermetelheid hê om my produk se professionele studio foto te gebruik – waarvoor ek ten duurste betaal het, jou bliksem – is jy laag en gemeen. Bo en behalwe die feit dat die foto kopiereg ophet, en die Boggom logo ‘n geregistreerde handelsmerk is, kan jy duidelik NIE ‘n produk van daardie gehalte lewer nie. Ook – hoe die moer gaan jy die Boggom logo daarop aanbring, en wegkom daarmee?

Wat jy MOES gedoen het, was bloot om vir Boggom te kontak, en te vra vir afslag op 20+ tafeltjies. Dan kon ons besigheid gesels het, jy hoef nie al die effort in te gesit het om ‘n enkele tafeltjie te bou nie, jou kliënt ontvang ‘n kwaliteit produk, en almal is happy, gelukkig en tevrede.

Maar nee – jy probeer eerder ‘n quick buck maak. En toe loop jy jou vas in 17,000+ Boggomjane, wat jou vasvat in die comments van jou knockoff se advertensie. Mooi man. Ek wed jou jy het nie daai een verwag nie.

Nou is jy bloot op my lys van mense om nooit, ooit mee besigheid te doen nie.

Groetnis,

~ Boggom

Boggom se oorspronklike soustafeltjie is hier te koop.

Leave a Reply

Your email address will not be published. Required fields are marked *