It’s not inside – it’s on top (6 September 2017)

Weereens gee ek my ouderdom lekker weg, want sien – indien jy die oorspronklike Cremora TV advertensie kan onthou, begin jy maar verlief neem met die feit dat middeljarige mense jou deesdae beginne ‘oom’ en ‘tannie’.

Selfs oom Jan Spies het dit op sy voorstoep gesit en beaam. Cremora was sy ‘koffiekapitaal’ – pure plaas. Ryk… en lekker.

Só het Cremora destyds goeie verbruikers van ons almal gemaak – of jy nou Ingils- of Afrikaanssprekend was. Cremora het vir dekades on top of die fridge staanplek gekry, of inside die spens.

Sedert 2014 is dit egter nie meer so rooskleurig in die land van koffieverromer en heuning nie.

Tannie Sarie Marais (wat in die wyk van die Mooirivier woonagtig was), het op 29 Januarie 2014 die koerante laat weet dat die rivier nou maar hernoem kan word na die Melkrivier, nadat daar ‘n groot hoeveelheid Cremora eers in die Wasgoedspruit, en toe later in die Mooirivier beland het.

Skaars twee weke na hierdie oepsie het ek, nes oom Jan Spies destyds, op iemand se stoep gesit en die eerste teug van ‘n koffiekapitaal-verrykte boeretroos geneem – en dit plotseling met ‘n sierlike boog bo-oor die stoepreling tot in my gasvrou se dahliabedding uitgespoeg.

Dit smaak my Nestlé het aan die resep gaan karring, of vergeet om ‘n bestanddeel terug te sit – iets wat heel moontlik vir altyd in die Mooirivier weggespoel het.

Indien oom Jan nog gelewe het, is ek seker hy sou met byvoeglike naamwoorde vir dié nuwe smaak vorendag kom wat vir geslagte onthou en oorvertelle sal word. Ek gaan nie eers probeer nie – ek bly vassteek op “Kuk Sleg”.

Nou ja.

Koffiekapitaal. Ryk… en lekker.Oom Jan Spies

Kort voor lank begin ek skalkse kyke in tannie Ellis Brown se rigting gee. Vir die eerste keer vandat ek kan onthou, skraap ek die moed bymekaar om haar uit te neem vir koffie.

Tannie Ellis het so ‘n sweempie van ‘n chemiese nasmakie gehad in die begin, maar skaars 3 bokse later was ek gewoond daaraan. Toe koffiekapitaal ek weer lekker, soos ‘n wafferse verromer-verraaier op die voorstoep.

Dit het Cremora sowat 3 jaar geneem om agter te kom dat ek gereelde koffie dates het met ‘n verrukliker verromer.

So ‘n paar maande gelede verloor Cremora 20% van haar gewig, en val van 1Kg na ‘n slanke 800 gram. Sy trek ‘n splinternuwe, stywe blou somersrokkie aan, fladder haar wimpers – en maak haarself goedkoper as tannie Ellis Brown for good measure.

Ek laat my egter nie so maklik verlei nie. Smaak is ‘n sintuig wat jy nie sommer net so in twyfel trek nie.

Wanneer ek wel geldjie het, koop ek nog steeds Ellis Brown. Dan gee ek die Cremora langsaan se slanke lyfie so ‘n vuil kyk, en gooi my kop vermakerig agteroor.

Ek is vreeslik bly ek het nooit vir tannie Ellis verneuk nie… ek sien sy het ook nou onlangs 20% van haar gewig verloor.

Maroelas en al daai mooi dinge,

© Boggom

Leave a Reply

Your email address will not be published. Required fields are marked *