Waarheen is boggom op pad

Waarheen Boggom op pad is – ook bekend as “Plan B”

Waarheen Boggom op pad is: ‘n stap-vir-stap verduideliking (met apologie aan Robbie Wessels)

As daar nou een ou is wat glad nie ‘n lang storie kan kort maak nie, is dit ek. Gelukkig het ek ‘n goeie verskoning, want sien – ek’s ‘n skrywer. Oftewel, ek probeer kliphard om een te wees. “Fake it ’till you make it” soos hulle sê. Ek gaan egter my uiterste bes doen om hierdie lang(erige) storie kort te hou.

Op hierdie stadium van die wedstryd voel ek dat ek jou, getroue Boggom-troplidmaat, ‘n verduideliking skuldig is. Van die buitekant af blyk dit dalk vir jou of ek totaal doelloos en sonder plan voortploeter, terwyl dit allermins die geval is.

Kom ons rewind tot by verlede jaar se Desember, en dan Action Replay ek vir jou my verhaal van daar af.

In Desember 2016 word ek vir die derde keer in my lewe by ‘n firma afgedank. Aangesien ek op daardie stadium nog besig was om te probeer herstel van werkloosheid rondte #1 (wat 21 maande geduur het en waartydens ek alles verloor het), was daar geensins ‘n veiligheidsnet of enigiets om op terug te val nie.

Plan A was om so spoedig moontlik ‘n boek te skryf, en dit dan aanlyn te probeer verkoop. So gesê, so gedaan, en ek ploeg voort. Ek baken die grense vir myself af as die 2015/2016 tydperk in my lewe, en die boek kry gestalte en ‘n naam: Aapstreke Volume 1: van Rotfontein na Magalieskruin.

Teen Februarie 2017 het ek genoeg van ‘n raamwerk om te begin voelers uitsteek na uitgewers wat dalk sou belangstel – net om wreed ontnugter te word. Die uitgewersproses neem sowat 13 maande, en selfs dan is dit nie ‘n uitgemaakte saak dat die boek ooit die lig sal sien nie. Ek besluit om die “self publishing” roete te gaan, aangesien ek nie oor die luuksheid van ‘n maandelikse inkomste beskik om vir 13 maande aan die lewe te bly nie.

Maart en April 2017 kom en gaan. Elke einde van die maand krimp my noodfonds. Ek steek my trots in my sak, en begin noodgedwonge by my handjievol Facebook vriende aanklop vir hulp. Terselfdertyd loop ek onder fel kritiek van sommige sogenaamde vriende deur, omdat ek nie net bloot begin soek vir werk nie.

Plan A – Die Boek
Plan B – Die NegosiewinkelBoggom

Kom ek staan gou bietjie terug.

Tydens my eerste rondte van werkloosheid het dit my sowat 21 maande geneem om ‘n tydelike joppie te bekom, wat toe darem vir vier maande ‘n inkomste gegenereer het. Daarna was ek weer werkloos vir bykans ‘n jaar, en moes ek uiteindelik vat wat ek kon kry. (Van hierdie aaklige, vernederende rondte(s) sal ek julle meer in die boek van vertel.)

Ek is blank, manlik, ouer as 50 en het redelike ernstige gesondheidsprobleme. Inteendeel – aflegging rondte #2 was indirek as gevolg van ‘n chroniese outo-imuunsiekte wat ek onder lede het. My enigste vervoer is byna net so oud soos my mondige kinders. My kanse om ‘n boek te skryf en te verkoop (Plan A) is dus (vanweë my eerstehandse ondervinding) veel beter as om ‘n betrekking te bekom.

Daarom ploeg ek moedig voort, terwyl my geld aan die einde van elke maand al hoe minder raak. Ek daag enigiemand uit om humoristies te probeer skryf vanuit daardie magtelose posisie, waar die druk by die dag net al hoe groter en groter word, en die einde van elke maand meedoënloos aangemasjeer kom – terwyl jou inkomste op Rand-Nul bly stil staan.

Uiteindelik word die druk net té veel, en my inspirasie en daarmee saam ook my storie, droog by die dag op. Ek verbreed naderhand my self-opgestelde grense (die 2015/2016 jare) en begin die boek van die voorkant af uitbrei. Aapstreke Volume 1 sal dus heel moontlik die vorm van ‘n mini-outobiografie aanneem – en veel dieper en baie meer emosioneel wees as oorspronklik beplan. Om Boggom te wees is beslis nie vir sissies nie. Ek skrik my telkemale wit vir die verborge seer wat my hele lewe vol lê, diep begrawe.

Plan B lê al ‘n geruime tyd en broei – Boggom se aanlyn Negosiewinkel. Die idee was dat Plan B chronologies en natuurlik sou volg op Plan A. Ek bedoel – dit maak tog nie veel sin dat ek ‘n Boggomboekmerk aan jou probeer afsmeer, as daar nog nie ‘n Boggomboek is om te lees nie, dan nie?

Maar nou ja – my finansies is wat dit is. Om werk te probeer soek is nie ‘n opsie nie, want Suid-Afrika is deesdae ‘n land waarin ek nie meer welkom is nie. Om werk te begin soek, is vir my net so goed as om die handdoek in te gooi en myself as ‘n mislukte skrywer te brandmerk; summier op te gee op my droom. Ook: Plan A, vir die rekord – is tussen 60% en 70% klaar geskryf. En dan moet Plan A mettertyd nog ‘n Volume 2 tot (ten minste) Volume 30 by kry.

Dus – aktiveer Plan B.

Dis waar Boggom nou trek. Kry die Negosiewinkel so spoedig moontlik aan die gang, om sodoende ‘n inkomste te genereer sodat ek ‘n dak oor my kop kan hou, en dalk selfs meer as net sop en brood te kan koop nou en dan. Voordat die geld totaal en al klaar raak, en ek met ongepubliseerde manuskrip en al weereens op straat sit. Sodat die ontsettende druk kan afneem, sodat ek kan slaap in die nag, en die mees belangrikste – sodat ek “Plan A Volume 1” kan klaar skryf, en verkoop.

Dis waar Boggom nou is. En dis waarheen Boggom op pad is.

Maroelas en al daai mooi dinge,

© Boggom
20 Junie 2017

NS: vreeslik dankie weereens vir al julle comments, onderskraging en ondersteuning. In my wildste drome het ek nie kon dink dat ek sulke awesome fans sou hê nie. 


Hierdie plasing is ook op Facebook beskikbaar vir kommentaar.